ريتو يقبرني

ريتو يقبرني

يقبرني…
لا يقبرني..
هاد كان لسان حالي وأنا عم اقرأ اخبار من هون ومن هونيك عن المقبرة الجماعية تبع درعا…أنو أخي شيلو المزح ع جنب الموت مافيه مزح ولا فيه شماتة
في مقبرة لما لأ؟؟؟
هلأ الجواب بوسائل الإعلام “الوطنية منها” و”المغرضة”
هلأ ما بعرف اليوتيوب إزا كمان متآمر ع سورية…مع أنو لونو مو أزرق وأبيض (هي كانت حجة أحد المتصلين ع قناة الدنيا لإثبات انو الفيسبوك اسرائيلي،واخترعوه خص نص لضرب الوحدة الوطنية وزعزعة الاستقرار ودس الدسائس على سورية مالئة الدنيا وشاغلة الناس…)
المهم خلينا نشوف الخبر من مختلف الجهات،ونبلش بجريدة تشرين،والخبر كالتالي:
“دمشق
صحيفة تشرين
الصفحة الأولى
الأربعاء 18 أيار 2011
صرّح مصدر مسؤول بوزارة الداخلية أن بعض محطات التلفزة ووسائل الإعلام نقلت في سياق حملة التحريض والافتراء والفبركة التي تشنها ضد سورية ومحاولاتها المستمرة للنيل من استقرارها وأمن مواطنيها خبراً عن شهود عيان حول وجود مقبرة جماعية في درعا.

وأكد المصدر أن هذا النبأ عار عن الصحة جملة وتفصيلاً، مشيراً إلى أن مواطنينا واعون لهذه الحملة المغرضة التي باتت مكشوفة في أهدافها وتوقيتها وخاصة مع استعادة درعا بشكل تدريجي لحياتهاالاعتيادية”…

يعني الخبر من أساسو عاري عن الصحة…الله لا يعريلكون محب غير بالحمام…(يعني لا بفرع مخابرات ولا غيرو)

‏طيب خلينا نشوف أحد المواقع الوطنية الشريفة غير المدسوسة واللي ما عندا لا أجندة خارجية،ولا أمريكا عم تدفعلا خرجية…

(كبيس هون)

هلأ الخبر يقول “

بعد العثور على جثثهم.. الرئيس الأسد يلتقي وفدا من عائلة أبا زيد ويستمع منهم إلى ظروف اختفاء أقربائهم

على عيني…طيب يعني سيادتو اجتمع مع أوبة نصابين؟ بما أنو الخبر عاري عن الصحة جملة وتفصيلا؟؟؟بس لا يكون نصبوا عليه للمسكين وبصّموه ع شي ورقة بيضا بالهيلمة مشان يساووها اعتراف رسمي بالإمارة السلفية…

بالمناسبة شو تعريف المقبرة الجماعية؟ أنو خمس جثث بحفرة…هدول مو مقبرة جماعية؟ شو هاد لكن جاكوزي؟مسبح عائلي؟عم يحمدوا ربهن لنمو البذار مثلاً؟

بس لا تكون الحفرة بتوصل على نفق درعا كرجات؟

أخي ما علينا…

سيادتو كتر خيرو نحنا معودين على أفضالو…عمل كالتالي،والكلام اقتباس من الخبر كما ورد على سيريا نيوز:

” “الرئيس الاسد وجه بالتحقيق المباشر في هذه الجريمة البشعة ومحاسبة الفاعلين أشد محاسبة”

هلأ التحقيق ع راسي من فوق…بس محاسبة الفاعلين شو يعني؟!

أنو العصابات المسلحة يتم القبض عليهن…أما كلمة “محاسبتهم أشد محاسبة” فهي كما فهمها مخي البهيم….معناتا أنو هنن من ضمن النظام…إما جيش أو أمن…

هلأ مبدأيا مافي أي رواية رسمية بتتهم حدا بمقتلون…يعني ما اتهموا عصابات مسلحة، بس لا حدا يستغرب أنو بكرة يطلعوا “المغدورين” ع قناة الدنيا وهنن عم يعترفوا انو عصابات هي اللي قتلتون،أو أنهن انتحروا بعد ما بلشت اعراض الاندساس تظهر عليهون…أو بأسوأ الأحوال مولانا البوطي بيتعشا أكلة قشة (مقادم ولسانات وحفاتي)….وبيشوف هالشهداء بمنامو وبيعترفولو خاصة أنو صار عندو فسحة باللاوعي تبعو “بتسرح فيها دبابة” من لما بطّل يشوف نجدت أنزور بالمنام بعدما صاروا صحبة وصار ينزل مطر كل يوم جمعة…

يعني أخي باختصار بفهم أنو اقرباء المغدورين الخمسة اللي التقت جثثهن اجتمعوا مع سيادتو…معناتا هاد الفيديو مو كزب:

ليش ما عم نشوفو ع قناة الدنيا وباقي القنوات الشريفة والوطنية؟؟

سياسة الاستحمار لأيمتا؟

يعني فوق ما عم تجدبوها….نسقوا بين بعضكون

وزارة الداخلية بتقول الخبر مو مزبوط،تاني نهار بيطلع الرئيس بيجتمع مع اهل الشهداء…يعني المعلم حطلون بعصة غير شكل لوزارة الداخلية

معقولة يعملوها ويرفعوا عليه دعوى نشر أخبار كاذبة والنيك من هيبة الدولة؟!

بتخيل رح يصير هيك بس مو هلأ…

لما يخلص مسلسل “جيش إين ذا سيتي”

One Response to “ريتو يقبرني”

  1. بضل بقراها وبقول حلوة

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: