كأنو أنت و أنا ما عم نحكي عن نفس الشي يا روحي؟؟

هلق أنا عضَّل لساني وطلع عليه شعر من كتر ما أخدت و عطيت مع ناس من موالي النظام. و اكتشفت أنو نحن عم نحكي عن أشياء مختلفة في بعض الأحيان مع أنو مفكرين أنوعم نناقش نفس الفكرة.

الثورة السلمية: 

المنحبكجي: إي إش هالثورة الحبابة؟ تكسير للتماثيل و شق صور ووضع الأحذية عليها و حرق مباني الدولة و ….عصابات مسلحة.

الرد: تكسير الأصنام هو حالة اعتراض سلمية و شق الصور ووضع الأحذية عليها كمان حالة اعتراض سلمية و حرق مباني الدولة اللي صارت ممثل للقمع و الترهيب هو كمان سلمي لأنو ما فيه إزهاق روح….و العصابات المسلحة؟ أنا برأيي الشخصي و من خلال متابعتي أنو مافي عصابات مسلحة الا في حالات أفراد مسلحين. كلللللللل الثوار على الأرض أو من المغتربين هنن ضد العنف تماما و لكن! و لكن في ناس من اللي ما عندن صبر أيوب و بيصعب عليه يلاقي أختو مغتصبة أو أبوه عم ينضرب على وشو بالبوط العسكري أو رفيقو بالحارة عم ينقتل….بيجيب بارودتو و بينتقم و لكن هي حالات قليلة جدا. ونحن من الاول كنا صادقين و ما قلنا الثوار قديسين. هي ثورة بشر و البشرعاطفيون و خطّاؤون.

الحرية: 

المنحبكجي: هي عنا حرية! منمشي بالشارع بأي وقت و منرجع بأي وقت و عنا أكلنا و شربنا و سياراتنا و مو ناقصنا شي.

الرد: هي حرية؟  أسفي على هيك حرية و هيك أحرار. الحرية أنك تعيش عيشة كريمة تختارها لنفسك تختار رئيس يمثلك…يمكن ما تكون راضي عن رئيسك هالدورة الانتخابية بس اللي بعدها رئيسك يكسب. الحرية أنك تكون حر من سلطة غير حَقّة…مو يجي الأمن و ياخدك على بيت خالتك لانك حكِّيت راسك بإيدك اليسار بدل اليمين. الحرية أنك إذا ما عجبك شي ببلدك اللي هي ملكك ترفع صوتك و تصيح لا أقبل و لما حدا ينهب خيرات البلد و يهربها لبرة يكنلك الحق ترفع سبابتك بنص عينو و تقلو من أين لك هذا؟ و هي التعريف بالقاموس للي مو مصدق: <كبيس هون>

الإصلاحات: 

المنحبكجي: هي إصلاحات (بس الله لا يوفق الثوارالله جابولنا ياهن بدمهن) وهي زادت الرواتب و كم كردي تجنسوا و فلتان بالشارع (!!!!!!!!) هي تركوهن على كيفهن و شرطي مرور ما بقى يسترجي يخالفن و بتقولوا مافي إصلاحات؟؟ (والله قيلت لي شخصيا).

الرد: هي هيي الإصلاحات؟ أنو يغيب القانون؟ هلق هيك فهموا مناداة الشعب بالحرية؟ أنو الناس تبني مخالف و تقطع عالأحمر و تعمل حفلات فلت بالشوارع و تطبيق و قلة حيا؟ بس نحن كشفناااااااااااكن على قولة قناة الدنيا. يعني مو كتير صعبة نفهم أنو عم تخلقوا الفوضى لحتى نرتعب و نقول حقي برقبتي على قولة أخواننا المصريين و الله يوفقك يا أسدنا ضل لأنو وقفتك ترعبهم و تضبهم. الإصلاحات المطلوبة كانت كتير بسيييطة بس فات أوانها من أربع شهور. كان لازم بشار يضحي برامي و عاطف نجيب على الغاء كم مادة من الدستور على اعتذار لأطفال درعا و أهليهن و خلصنا! بس فوق الغباء بالتصرف كمان عنجهية و ما بيرموها واطية.

فشل الثورات: 

المنحبجكي (من أمثال اللاشريف شحادة): فشلت الثورة في مصر و هل يريد هولاء المخربون لسورية أن تلحق بمصر و حال مصر؟

الرد: يا رييييييييييييييييت! يا ناس يا هو..في شي بيكون خربان لعشرااااات السنين حتى من قبل عهد اللامبارك…وبدو يتصلح بشهور؟ يعني كل الخراب اللي لحق بمصر و الفقر و التخلف و المياه الملوثة و الطعام المسرطن و بدن يصلحوه بشهور؟ ليش المصريين طلعتلن العصا السحرية مثلا؟ و نحن كمان لما يسقط بشار رئيس العصابة و رامي شهبندر التجار و ماهر السفاح بدنا نضل نتخبط فترة لنعرف وين رايحين و إش بدنا بس رجعة لورا مافي و أسوأ من هيك ما ضل و مافي طريق غير إلى الأمام.

و بالأخير سؤالي؟ هل نحن عم نحكي عن نفس الشي يااااااااا روحي؟

 

 by: RamaPanorama

One Response to “كأنو أنت و أنا ما عم نحكي عن نفس الشي يا روحي؟؟”

  1. عندي شك بصراحة تكونوا عم تحكوا عنفس الشي..
    لك العمى عهالنظام حتى المفاهيم الحلوة تشوهت !!
    شكراً علمقال و الله لا يعميلنا قلب

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: