يا حرام يا سوريا

.
.
.
يا حرام يا سوريا
شو عملو فيكي
لاء و مين يلي عمل هالشي
ناس مسميين حالن اولادك و حُماتك
ما بعرف شو قلك يا إمي
انا بعتذر عنن
بتئبلي اعتذاري ؟
انت كبيرة و بتسامحي
وبعرفك رح تسامحي
بس يا تري اهالي اولادك يلي اندبحو و انقصفو رح يسامحو ؟
ما بعتئد

على كل حال بس بدي ئلك إنو
انا و هالكم مليون يلي معي ابدن مو راضيين عن هالشي
وعم نموت كرمالك
طول عمرك راسك فوق
والتاريخ بيشهدلك
حروب و احتلال و غزوات و فتوحات
بس الفرق انو كانو كلن غربا
بس هالمرة مو غربا يا إمي
هالمرة سوريين
من صلبك
شربو من ميّاتك
و أكلو من خيراتك

محدا فهمان شو بدن
جاه و سلطان ؟
صارلن 40 سنة عايشين بهالجاه
بس على حسابك و على حساب بائي اولادك
ما بدن يتركو البائي يعيشو
بدن بس هنن يعيشو
بدن يحطو راسنا بالأرض
بدن يخرسونا و ما نفتح تمنا بحرف
بس لاء و الف لاء
مارح يئدرو
انت بلد العزة و الكرامة و نحن متلك
ما بنرضى بالذل
شعبك يا سوريا ما بينذل

نَسبوكي يا سوريا لعيلة وحدة
صار اسمك مرتبط فيهن
مرتبط باسم قتلة و مجرمين
ونحن مو رضيانين
انت تبعنا كلنا
انت سوريا الشعب
وعم نحارب مشان تبئي إلنا

بعرف انك مو رضيانة عن هالشي يلي عم يصير
سمعان صرخاتك
شايفك عم تنزفي
حاسك عم تتخبطي
بس هي مسألة وئت
ورح تنولدي من جديد
سوريا الحرة
سوريا الشعب
ورح ترفعي راسك فينا
ورح نرفع راسنا فيكي

ئلك شغلة ؟
كنت استحي ئول انا سوري اه يا نيالي
بس هلاء بس عم شوف اولادك بالشوارع
عم يضّحو بالغالي و الرخيص كرمالك
صرت ئولها بالتم المليان و بملاة صوتي
انــــــــا ســــــوري و أأأأأأأأأأأأأأأأأأأخ يا نيـــــالي
معلش هلاء الأأأه مليانة وجع و ألم
بس عنئريب رح تصير ااااه الفرح
عنئريب رح نعمل فترة عزا و حداد كرمال شهدائك
بس بعدها رح نعمل الأفراح و المباركات و نحتفل فيكي
رح نحتفل برجعتك إلنا

والله مستحي منك
وما عم استرجي طلع بعيونك
كيف بدنا ناخدك من السوريين و نعطيكي للسوريين
لك كلنا سوريين
بس همشّونا يا إمي
لما اختلفنا معن بالرأي صرنا خونة وما منحبك
مفهوم منحبك عندن غير
عندن كلمة منحبك بفتح الباء
بس نحن كلمة منحبك تبعنا بكسر الباء
نحن منحبك إلك انت و بس

عَلمك صار غير
صار احمر و اسود بس
دم و حزن
مابئى فيه فرح و سلام و حب متل ما علمتينا
راح الأبيض و راحو عيونك الخضر

مارح طول عليكي
يلي فيكي بكفيكي

صبراً سوريا
النصر لك و الحرية لك
عُشت حرة أبية
و عاش ابناؤك أحراراً كما ولدتيهم

2011 – 1 رمضان

BY: Anas Kamikaze

No comments yet... Be the first to leave a reply!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: