حكواتي الثورة | حلقة 3 – الله سوريا حرية وبس

 

آذار 2011

 

 

كان يا مكان
أو لستا لهلئ كمان
الثورة السورية
الي عم نستناها من زمان
قلتلكن مبارح شو صار بالمرجة
وكيف صارو المعتصمين فرجة
المسبحة فرطت
وكرجت بفرد كرجة
ونفس الياسمينة الي قالت للجورية
سوريا بدها حرية
قالت للنظام وبعينها دمعة
منتحاسب يوم الجمعة
ضحكو عليها وما صدقوها
بعمركن سمعتو بهيك سمعة؟؟
18/3
يوم الجمعة
دمشق وحمص
بانياس ودرعا
الشعب السوري كسر الصمت
وقلو انقلع روحة بلا رجعة
اوبلا طول سيرة
الي صار بهاليوم شغلة كتير كبيرة
مشان هيك يلي واقف عالباب يقعد عالحصيرة
لانو اليوم لح طول مو متل العادة
يا ولد.. جيب من عند جارنا السجادة
المهم
والساعة 12و40 دقيقة
وهالحكي بالشام العتيقة
بمكان قريب للحريقة
في جامع أخر الحمدية
عم يصرخو فيه
الله وسوريا وحرية
يعني الشعب بطل ياكل خس
ويقول الله سوريا جنابو وبس
طبعا الأمن معبى بساحة الجامع
وصارو بدن يسكتو يلي صوتن طالع

والياسمينة ضلت ناطرة عالباب
عم تستنى ليطلعو الشباب
والصوت الي كان طالع… فجئة غاب
و اشتغل الضرب والتعفيس
واعتقلوا يلي ما قالو اسم الرئيس
ركدت الياسمينة لعند الجورية
وهيه عم تقول الله سورية وحرية
ومن هداك اليوم صار يلي يقول
الله ..سوريا ..حرية وبس
اسمو مندس
وبنفس الوقت قامت حمص العدية
والكل بدو حرية
وبلشت من جامع أبن الوليد
هي مظاهرة ها مو مسيرة تأيد
ولا يخلو الأمر من شوية رصاص
كأنو عم يقولو للشعب خراس
وكمان هيك صار ببانياس
والا شوي كان لح يشتغل القواص
بس الكارثة يلي صارت بدرعا
والأمم عند العمري مجتمعة
ومتل ما قالو لرئيس الفرع المحتال
انو نسوان درعا ورها رجال
لك اييييييييه والله رجال
المهم

تحركو من عند العمري بتجاه درعا المحطة
بظو عيون الأمن وكأنو دحشولن بقفاهن شطة
واهتز عرش الأسد… مدري القطة
استعان الأمن بكم صهريج أطفاء
ما مشي الحال عملو للفكرة ألغاء
أجى الأمر بأطلاق الرصاص وبلشو الأمن عالناس قواص
وسقط أول شهداء الحرية
بالثورة السورية
كانت الحصيلة أربع شهداء
وأولهن محمود جوابرة
قبل ما أمشي
سمعونا الفاتحة
على أرواح شهدائنا الطاهرة

يتبع………..

 

 

 

بقلم: وئام عيسى

 

 

 

 

 

 

No comments yet... Be the first to leave a reply!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: