حلاوة وزيتون | لقاء مع ديلامو

لقاء مع المعتقل السابق ديلامو في برنامج حلاوة وزيتون..

إنك تطلع ع الشارع وتصرخ للحرية، وتهتف لنصرة باقي المدن المحاصرةشي عظيم كتير،وإنك تعتقل رح تتوج نضالك بوسام شرف مابيمحي الزمن…إنك تعتقل مرة ومرتين وتلاتة، وتضل مكمل… هي هية الروح اللي سوريا عم تستناها من كل ولادهاضيفنا بحلقة اليوم ديلامو، اعتقل 3 مرات وتم الاعتداء عليه بالموس والسكاكين، 12 طعنة موزعة بالرجيلن والفخد والساق وأماكن تانية بجسمو

– ديلامو واحد من شباب سوريا الشجعان معنا اليوم ببرنامج حلاوة وزيتون..
أهلا وسهلا فيك

– أهلا فيكي..شكرا..

– ديلامو… بدك حرية؟ شو كنت تجاوب بقلبك وقت كانو يسألوك هالسؤال؟

أول شي كنت قول مو بس بدي حرية بدي اخلص منكن.. كان بدي شغلات أكتر من الحرية بكتير.. نحنا منقول الله سوريا حرية وبس.. هنن بيقولو الله سوريا بشار وبس..

– الثورة غيرت نظرتك للحرية؟ انت كشب غير مسيس اتغيرت نظرتك للحرية قبل الثورة عن بعدها؟

نحنا كسوريين كانت ممنوعة عنا السياسة.. والحياة السياسية ما كانت موجودة تقريبا.. بس وقت انطلقت الثورة السورية عرفنا أديش كان رايح علينا قصص وشغلات، نحنا كسوريين متابعين للقضية الفلسطينية ولاخوتنا اللبنانيين بجنوب لبنان، ونحنا السوريين يلي فتحنا بيوتنا للبنانية وفتحنا قلوبنا أبدا مو النظام..

– عقوبة طعن البني آدم توقف عجنب – عقوبة بالروح بالدم نفديكي ياحمص 12 طعنة بالسكين مع الحباشات”هي العبارة إلك، مؤلمة كتير وعميقة…حكيلنا شو صار معك… وليش برأيك هيك صار؟

كنا طالعين بمظاهرة قريب من دمشق بقرب احد الفروع الأمنية ، ب3 شباط بعد القصف العنيف لباب عمرو، هجمو علينا الأمن من الخلف وما حدا انمسك غيري، وضربوني كتير وعملو يلي عليهون من الاصلاحات اللازمة، وحصيلة الاصلاحات كانت 11 أو 12 طعنة وكسر بريشتين بالقفص الصدري فوق القلب تماماً، اضافة لأنو تقويم السنان يلي حاطو اتجعلك جعلكة و كسر بالجمجمة سببلي فقدان توازن لمدة شهرين تقريباً، وقت كنت مكوم بالأرض وكنت مغطي وشي وراسي بجاكيتي وحوالي عشرة شبييحة عم يرفسوني ويضربوني بالروسيات، حسيت أنو في حدا عم يضربني بس كان الضرب متل سياخ النار عم تفوت فيي رفعت الجاكيت واتفرجت فلقيت هالشخص نازل ضرب بجسمي بسكين أو موس كان معو.. أنا ماعم افهم هادا الزلمة اذا عندو قلب ولا لأ!! هلأ رئيس الدورية وقت شاف الشبيح عم يطعنني طلب منه يوقف على جنب وأنا بتخيل أنو طلب عدم الطعن كان مش حفاظاً على حياتي بقدر ما كان انو وقت كون معتقل مصاب فرح يضطرو يطالعوني من السجن بسرعة.
المهم طالعوني من السجن وكان بنطلوني معبى دم ووشي كلو دم كمان، ما كنت قدران وقف، حملوني حمل واخدوني ع الباب..

– الاعتقال بيكون غالباً يا “متلبساً” بقلب مظاهرة، أو “مداهمة” لأشخاص مطلوبين أو بالغلط هيك مرقة طريق…إنت اعتقالك كان ع خلفية تظاهر، وبنفس الوقت قابلت بالمعتقل شباب من ركن الدين حكيت عنهم سابقاً حكيلنا عن تجربتن…

أول شي بدي خبر كل الشباب المعارضين أنو انتو رح بيتم اعتقالكون بمقابل أو ببلاش، فنصيحتي الكم أنو لا تخلو اعتقالكون يكون ببلاش.. اطلعو واتظاهرو وشاركو بالثورة وخلي اعتقالكون يكون بمقابل مهم..
الاعتقال الأول كان من جامع الرفاعي ب8 نيسان 2011 وكنت واقف على جنب بعد ما هجمو الشبيحة ع الناس وتم اعتقالي من هونيك..
الاعتقال التاني كان برمضان بعد ما فشلت خطتنا لاقامة مظاهرة بالجامع الأموي، بعدين رحت ع السويقة على جامع النقشبندي لأنو كنت بدي الحق مظاهرة طالعة هونيك واتفاجأت وانا راكد للحق المظاهرة بأنو عصابات الشبيحة كانت محاوطة المكان كله،و تم اعتقالي من منطقة باب السريجة قبل ما أوصل حتى على السويقة.
أما الاعتقال التالت فحكيت عنه قبل شوي وكان ب3 شباط 2012.
أما شباب ركن الدين فهنن شباب راحو على فرع الأمن سلمو نفسون على خلفية الاعلانات يلي طلعت على التلفزيون ويلي عرضت على الناس أنو يروحو يكتبو تعهد بعدم العمل بالسياسة وعدم التظاهر وانو رح بيتم العفو عنهم بعد كتابة التعهد ولكن النظام فعلا غدار.. هدول الشباب فاتو قبل رمضان على المعتقل وما طلعو لأول يوم العيد.

– الإضراب وسيلة بيستخدمها السجناء كأداة ضغط لتنفيذ مطالبهن، واحتجاج على بعض القوانين…ديلامو… إنت أضربت بالسجن خلال اعتقالك التاني، ليش؟ شو كان هدفك؟ وشو ردة فعل المساجين و والسجانين؟

الحقيقة أنو الاضراب بيمشي حالو بكل دول العالم إلا بسوريا، كان اعتقالي التاني وأهلي ما بيعرفو وين مكاني، كنت أنا مو عرفان أديش بدي ضل، وبدي وصل خبر لأهلي بمكاني، وكان اضرابي اشارة مني للمخابرات أنو أنا هون.. موجود… وعندي حق..

نصحوني المساجين أنو ما اعمل الاضراب لأنو بمرات سابقة في شباب أضربو ولكن تم تفرقتهم ونقلهم على فروع تانية، وطوّلت فترة اعتقالهم أكتر من اللازم كعقوبة الهم على الاضراب يلي عملوه.

– انت أول ما بلشت اضراب كيف كان شكل الاضراب؟ اضراب عن الاكل والشرب؟ أو احداث ضجيج أو شو بالضبط..

أنا بديت بالاضراب عن الأكل والشرب.. والشباب خبرو السجان انو أنا صرلي أكتر من 24 ساعة بدون أكل وشرب.. فالسجان استهزأ فيني وقلي أنو اسأل يلي قبلك وقت اضربو شو صار فيهون.. وقلي انشا الله عمرك ما تاكل..
أنا كنت بدي الفت نظر السجانين.. ولكن الحقيقة أنا لفتت نظر المساجين.. لأنو كانت لهفتهون كبيرة عليي.. الشباب ما شاركوني بالاضراب ولكن كتير دارو بالهون عليي ..

– التظاهرات يلي صارت بالمزة يوم السبت الماضي كان شي مهم كتير.. برأيك دمشق عم تفوت أكتر بالحراك الثوري؟؟

اي.. عم تفوت اكتر.. ولكن الحقيقة أنو نحنا ما فينا ننسى أنو أول هتاف بالثورة السورية انطلق من دمشق من ساحة الحريقة بتاريخ 17 شباط 2011 الشعب السوري ما بينذل ، وهي الجملة قلبت المفاهيم عند كل السوريين من عين ديوار بأقصى الشمال الشرقي لدرعا.. وقتها اجا وزير الداخلية وصار يقول عيب.. وكأنو المظاهرة عيب!!..

– بالميدان طلعو اعداد هائلة بيوم تشييع الطفلة هبة الديراني ولكن هدول الناس طلعو مرة واحدة وما بقا شفنا تظاهرات بها الكثافة بدمشق بعدها.. رغم انو فكرنا وقتها انو هي شرارة رح تشعل دمشق اكتر.. برأيك هالمرة رح تكون مختلفة؟ يعني رح نشوف تظاهرات كبيرة بالأيام القادمة؟

يوم تشييع هبة أو خالد الفاكهاني أو ابراهيم الشيباني بشكل خاص كانت التظاهرات معبية منطقة الميدان كلها بشوارعها الرئيسية والخلفية.. الحقيقة أنو أنا بشوف أنو الميدان بهي الفترة متل منطقة الغوطة بأيام الاحتلال الفرنسي.. منطقة حراك حقيقي..
ونحنا كل ما مندعو لتظاهرة علنية وكل ما بيكون في تشييع منروح ومنلاقي المخابرات سابقيننا لهونيك ومبلشين اعتقالات، أضافة لأنو المؤيدين بيعملو دعوة لمسيرات مؤيدة بنفس المكان يلي منكون نحنا مخططين فيه للتظاهرات..
الأمن عم يضغط على أهالي الشهداء.. عم يجبروهن يدفنو الشهداء على صلاة الفجر أو بأوقات غير المسجلة على النعوات المعلنة.. يعني الضغط الأمني على دمشق هائل جدا..

– ديلامو حابب تضيف شي؟

بالنهاية بدي قول لبشار الأسد انت وقعت مع الشعب السوري.. لا تسمع نصائح العالم ولا تتنحى ولا ترحل نحنا يلي جايينك على القصر الجمهوري..

الحرية الك والي ولكل السوريين .. ديلامو كنت معنا اليوم ببرنامج حلاوة وزيتون… وسلامات للكل..

 

 

 

No comments yet... Be the first to leave a reply!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: