الجيش الحر أمانة .. لا تخونو هالامانة .. !

 

 

 

 

 

 

 

 

 

Rony Freedom
——————————–

تعبان .. تعبان كتير .. من حالة بلد .. من وضع بلد .. عم نطلبلو حريّة ..

تعبان لاني عم حس كل شي انشغل من قبل لوصلنا لهون عم يروح بهالوقت ..

لح نخلص بالنهاية ولح يسقوط النظام .. بس لح نكون انهرنا ولح يكون الشغل اللي عنا ياه واللي بدنا نشتغلو اضعاف مضاعفة ..

ببلادي في شباب عم يحملو سلاح .. شباب بعمر الورد .. عم يحملو سلاح ..

بزكرونا بايام ما كنا نصدق وقت نشتري فرد الخردق .. ونعد نلعب فيه ومبسوطين انو في شي .. بيشبع غريزة الانسان .. للميل للعنف ..

ما كنا ننبسط بالفرودة صرنا ندور عالبواريد الخردق اللي بتأزي اكتر .. السادية والعنف والحب لتحسس الالم كان جوات هالعالم كلا ..

عم شوف هيك بلادي هالايام .. عم تتحول لحب سادي عنفي وعلاقة سادية بين الثائر وارضو ..

الثائر ما بينبسط الا لما يدعي عحالو .. انو ان شا الله ننقصف لنرتاح .. ان شا الله ننضرب لنرتاح .. ليش ما عم يقصفو علينا .. 😦 يحلو عن بابا عمرو ويجو يقصفو علينا ..

ما عم يرتاحو لحتى يشوفو الدم قدامن .. ساعتا بقولو هلا اهل حمص ولا اهل .. اللي اتضررو وين ما كان ما بقا يحكو علينا ..

كان الكل طالع ليطلب حرية كان تفكيرو كيف بدو يخدم الثورة كيف بدو يقدم اكتر .. هلا تفكيرو .. كيف بدو يحس بالالم اللي حواليه بانو يشوف الدم .. جنبو وين ما كان عم يسبح فيه ..

كيف بدو .. يعين الناس اللي عم تنقصف كيف بدو يامنلها اكل ..

عم شوف .. النظام عم يربح .. النظام زائل اكيد .. والى زوال .. وما عم يطول هلا الا لانو نحنا ما عنا خبرة وعم نسمحلو يلعب فينا .. ما عنا العقول اللي قدرانة تفكر وتخلينا نفكر معها ..

ما بعرف لوين لح نوصل بهي الحالة .. لك صار عنا خوف كلياتنا من سقوط النظام انو لوين لح يودينا .. اكيد لح تكون نهاية احسن من الدم الحالي .. بس في حدا ضامن شي ؟ ما حدا ..

المشكلة هلا عند مفترق طرق كبير نحنا .. يا العالم بدا تستوعب انو الحل مانو .. بالله محيي الجيش الحر .. ابدا مالو الحل انو .. نبقا قاعدين .. وكل العالم والحراك وقف شغلو .. كل واحد وعم يقول الله محيي الجي الحر والجيش الحر حرر هالمنطقة واحتل هالمنطقة ..

صار عندكم قناعة انو الجيش الحر ازا بدو يشتغل شي ليفيد البلد .. لازم يتحرك بتنظيم لازم يتحرك بعقلانية يكونو في عالم مسؤولين عليه .. ويعرفو يفكرو .. يقدرو يدبرو عمليات اغتيالات .. عمليات … عسكرية نوعية يقدرو يضربو خط كهربا اساسي عن شي فرع يعملو عمل .. يخلينا نحسو انو جيش حر ..

ما ضلينا سنة ونص عم نحارب بالكلمة والحق اللي بتقتل النظام لنجي اخر شي .. ونحطها بايدين شباب هنن أرجل مني ومنك ومن الكل وحاملين رواحن عايديهم اكيد ..

بس .. استبدلو الخردق .. اللي فوق برصاص حقيقي .. هالمرة .. والموضوع .. بالنسبة الن العالم عم تحيين .. وعم تقلن الله محييكم والله يحميكم .. هنن شباب عاديين متلك متلو متل اي واحد فينا بس قررو يحملو سلاح .. طيب جربتو تحكوهم ؟ تناقشوهم ؟ تشوفو الخطة اللي معهم ؟ ما لازم يكون في هدف واضح لاي عملية عسكرية ؟ ولا بس انو تنقلب المكان لفوضى هوة شي .. كافي

.. مو هيك لح تجي الجرية .. النظام مانو فارق معو لا جندي .. ولا دبابة .. ولا .. اي شي .. ما فارق معو كل هاد عندو منن كتير ولح يبقا مبسوط بقتل هالشباب اللي عم يروحو بين الرجلين ..

بس تشوف فيديوات اللي عم تقلك الله محيي الجيش الحر والله اكبر تدمير دبابة .. كم شب من هالشباب ماتو مقابيل هالدبابة لتفجرت .. عندو غيرا مليان .. مانو كتير سائل لا عنا ولا عن اللي عم يقاتل جواتا ..

هالشباب اللي ما حدا عم ينبهن انو هاد الحل والرصاص الخفيف والاربي جي .. والمدري شو مانو حل ..

بدي الشباب اللي قاعدين ومبسوطين بالمتعة الزاتية .. بالتعذيب النفسي .. وبالسادية اللي عم نعيشها .. انو يوقفو بس هتاف متهور للجيش الحر ..

انتو عم تخربو الجيش الحر وقت عم تحملوه شي مالو قدو ولا لح يكون قدو بيوم من الايام ..

ما بعرف شو بدي احكي اكتر من هيك .. بس عنجد .. مخنوق .. مخنوق لانو عم تخونو الجيش الحر وعم تخونو .. هالشباب اللي عم يحملو سلاح .. وعم يروحو بس عم نتشهد عليهم ازا عرفناهم او ما عرفناهم ..

هلا بدكم تقلولي .. شو البديل ؟ السلمية هية البديل ؟ لح قلكم .. مو السلمية ومو السلاح .. الموضوع مانو موضوع انو السلاح هوة حل وانا ما معي العصاية السحرية ولا بنجّم بالقمر ..

بس متل ما عم تقلي انت انو السلمية هية البديل انا فيني اجي وقلك انو السلاح هوة البديل ؟ شفت انت انو السلاح اللي استخدم بكل سوريا من قبل هوة حل ناجح كان ؟

الموضوع ما بيجي بهالطريقة .. الحركة الاخيرة بدمشق شلّت الحراك عالاخير .. فيكم تشوفو الشباب اللي كلو التهى بالاغاثة .. وكلو التهى بالاكل والشرب وتامين .. العالم اللي نزحت والعالم اللي انهدت بيوتا .. ارتحنا نفسيا انو قال الشام صارت متل حمص .. اي وبعدين ؟

اللي بدو ينظّر ينظّر واللي بدو يسمعني حكي لاني برات البلد يسمّع واللي بدو يقول شرف نزيل ورجينا .. لح قلو ازا انا لحالي نازل ورجيك ما لح يكفي : ) ازا بدك تتفرج عليي ما لح يكفي يعني كون اكيد .. شو ما بدو يقول معكم حريّة .. طرح كامل الاراء .. بكل اريحية .. وحريّة ..  : )

ما بعرف ازا فيني لخصها اكتر .. بانو ازا الانسان مجروح .. واكل ضرب .. وعم ينزل منو دم .. وعم يدور عالدوا .. وما لقا الدوا اللي يطيبو واللي يخليه يكون .. بخير واحسن .. ويطيب هالجرح ..

بس عندو دوا واحد ما عندو غيرو جرب يحط منو اول شي .. كان مسكّن .. صار يسكّنلو المو انو عم يرد شي من الوحشية اللي عم يواجها ..

بس هالدوا عم يفاقم الدم بالنهاية ما عاد عم تحس بالوجع لانك تحت القصف وغيرو .. عم تشبع هي الرغبة بس انت عم تقدم حل دموي اكتر وعم يخلي جرحك يضل عم يدمى اكتر واكتر وانت عرفان انو ما هاد هوة الحل .. ليش لتبقى .. مكمّل باخد هالدوا …

نحكي نقطة تانية ؟ شو صار بالميدان ولا القابون مثلا ؟ هدول المناطق ما كانو محررين اصلا ؟ يعني شو تغير فيهم بعد فوتة الجيش الحر الا انو اعلناها منطقة محررة ..

صورنا اثار الدمار الاسدي .. التتار مر من هنا ؟ اي ؟ وبعدين ؟ شو اللي تغير بالميدان ؟ الميدان اوريدي كانت محررة وكل يوم مظاهرات ومسائيات .. وكلشي موجود فيها ؟ شو استفدنا جربنا نسال حالنا بس ؟

كفرسوسة مالا محررة ؟ القابون مالها محررة ؟ .. الحريّة بتفكير الاهالي بتفكير ساكنين المكان .. الحريّة مالها انو نصير منطقة منكوبة ولا انو .. نستلذ انو نحنا مالنا .. انقص من حمص بدرجة ..

2 Responses to “الجيش الحر أمانة .. لا تخونو هالامانة .. !”

  1. سوري ثورجي Reply 23/07/2012 at 13:31

    ضحكتني هالمقالة وما بدي اضحك
    المازوخية يلي عند الكاتب فظيعة وبدو يلبسها لغيرو
    يا حبيبي الحرية بسوريا ما بتتاخد بالحسنى الحرية بتنقلع من وسط الشوك يلي زارعو النظام
    الاحساس بالغير لا يعني تطبيق الاحاسيس البائسة والمازوخية على الشعب الثائر
    والجيش الحر يلي عم تتمنطق عليه هو الحل الوحيد بعد فشل المحاولات السلمية بس للاسف شكلك من جماعة سلمية للابد كرمال عيونك يا اسد … السلمية شيء راقي وبيحتاج لعقول مستنيرة مو عقول مسطحة ومستديرة وبتفهم سياسة الحل الواحد وانا رب الثورة وكل شي عم بيصير غلط غلط غلط …. اذا انت بدك حرية خلي الشعب يمارس الحرية بتفكيرو ولا تلبسو توب ضيق وتعملو مازوخي

  2. بنت الشام Reply 24/07/2012 at 14:19

    الكاتب مشكورا مو عرفان الله وين حاطو
    الحراك بالشام هلأ بأوجو واذا ما بدو يصير هيك بحياتها ما بتخلص … لا تنسى عزيزي المتألم انو يلي حملو السلاح هنن نفسهن يلي كانو بالسلمية بالاول بالتالي الوصول للسلاح نضج ثوري والاصرار على السلمية المطلقة واعتبارها البديل لا منطقي وعبارة عن افلاطونية.
    بعدين شغلة تانية عزيزي هاد خيار اغلبية الشارع واذا ما عجبك هي هيالديمقراطية الا اذا بدك ديمقراطية الرأي الواحد يلي بيلغي الاغلبية ورأيهن و

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: